एजेन्सी । अधिकांश मानिसहरु मोबाइल त्यो पनि स्मार्टफोनको व्यापक प्रयोग गर्ने गर्दछन् । त्यसमध्ये पनि कतिपय यस्ता मानिसहरु हुन्छन् जो सुत्नुभन्दा अघि अध्यारोमा वा रातको समयमा स्मार्टफोनमार्फत काम गर्ने गर्छन् । जसबाट आँखा र मस्तिष्कमा नराम्रो असर पर्ने गर्दछ । यस सम्बन्धमा थुप्रै अध्ययन अनुसन्धान भइसकेका छन् । र ति सबै अनुसन्धानले अध्यारोमा स्मार्टफोन चलाउनु खतराजनक हुने बताएका छन् ।
अमेरिकन मस्कुलर डिजेनेरेशन फाउन्डेशन (American Macular Degeneration Foundation, AMDF) ले गरेको एक अुनसन्धानका अनुसार यदि अध्यारोमा ३० मिनेटमात्रै पनि स्मार्टफोन चलाएमा यसबाट हाम्रो आँखा सुख्खा हुन्छ । आँखा सुख्खा भएमा रेटिनामा गम्भीर असर पर्न सक्छ । लगातार यसरी अध्यारोमा स्मार्टफोन चलाएमा आँखाको ज्योति कम हुने सो अध्ययनले देखाएको छ ।
त्यसरी नै अमेरिकाको हार्भड युनिभर्सिटी (Harvard University) र युनिभर्सिटी अफ ओरसेष्टर बेलायत (University of Worcester, England)ले पनि यस सम्बन्धी थुप्रै अनुसन्धान गरेका छन् । सो अनुसन्धानले पनि अध्यारोमा स्मार्टफोन चलाएमा हानी गर्ने प्रमाणित गरेको छ । समयमा नै साबधानी नअपनाइए यसको असर आँखामा मात्रै नभई शरीरका अन्य अंगहरुमा पनि पर्नेछ ।
यी हुन् यस्तै अनुसन्धानमा पाइएका अध्यारोमा स्मार्टफोन चलाउदा हुने हानीहरुः
१. आँखाको ज्योतिमा कमि आउनु
रातिमा सुत्नुअघि मोबाइल चलाएमा आँखाको रेटिनामा गम्भीर असर पर्छ । अमेरिक मस्कुलर डिजेनेरेशन फाउन्डेशनका अनुसार यसबाट आँखाको ज्योति कमजोर हुन जान्छ ।
२. निन्द्रामा कमी आउनु
रातको समयमा सुत्नुअघि मोबाइल चलाएको खण्डमा शरीरमा मेलाटोनिन (Melatonin) नामक हर्मोनमा कमी आउन थाल्छ । हार्भड युनिभर्सिटीले गरेको अनुसन्धानका अनुसार शरीरमा मेलाटोनिन हर्मोनको कमी आएमा राति अबेरसम्म निन्द्रा नलाग्ने समस्या आउँछ ।
३. तनाब बढ्नु
युनिभर्सिटी अफ ओरसेष्टर बेलायतले गरेको अध्ययनले राति अबेरसम्म स्मार्टफोन चलाएमा शरीरमा मेलाटोनिन हर्मोनको कमी आउँदा तनाब बढ्ने देखाएको छ ।
४. मस्तिष्कमा असर पर्नु
राति अबेरसम्म स्मार्टफोन चलाएमा ब्रेन ट्युमर अर्थात मस्तिष्कको क्यान्सर पनि हुन सक्छ । युनिभर्सिटी अफ बोर्डेक्स (University of Bordeaux) फ्रान्सले गरेको एक अध्ययनले यसबाट मस्तिष्कको स्मरण शक्तिमा पनि असर पार्ने देखाएको छ ।
५. थकान महशुस हुनु
राति अबेरसम्म मोबाइल चलाएमा शरीरले पुरा निन्द्रा पाउन सक्दैन । यसले दिनभर नै थकानको महशुस हुन्छ ।
६. ग्लूकोमा (Glaucoma)
राति अबेरसम्म मोबाइलको प्रयोग गर्नाले मस्तिष्कसम्म सन्देश लैजाने अप्टिक नर्भ (स्नायु)मा असर पर्छ । यसबाट ग्लूकोमा नाम रोगको शिकार हुन सकिन्छ ।
७. आँखाको सिलियरी मांसपेशी (Ciliary muscles)मा असर पर्नु
राति लामो समयसम्म मोबाइल चलाएमा त्यसले आँखाको सिलियरी मांसपेशीमा असर पर्दछ । जसले आँखाको फोकस गर्न सक्ने शक्ति कमजोर हुन्छ । र आँखालाई कुनै कुरामा फोकस गर्न समस्या आउँछ ।
८. आँखा रातो हुनु
राति लामो समयसम्म मोबाइल चलाएमा मोबाइलको प्रकाशले आँखामा असर गर्छ । जसबाट आँखा रातो हुने समस्या देखिन्छ ।
९. डार्क सर्कल
राति अबेरसम्म मोबाइल चलाएमा यसबाट आँखा दबाव पर्न जान्छ । यसबाट डार्क सर्कलको समस्या देखिन सक्छ ।
